Salungano! Salungano! (Sankambe tshi Vhulaisa Muzhou)

Salungano! Salungano!

Sankambe na Mudzhou zwo vha zwi tshi dzula mudini muthihi nahone zwi na na muri wa mutshelo ngomu mudini. Muri uyu wa mutshelo wo vha u tshi vhidzwa Muthathalidzhane nahone wo vha u tshi anwa mitshelo ya makero o omaho.

Zwino mitshelo yo vha i tsini na u vhibva, tshifhefho tsho simuwa. Sankambe na Mudzhou zwa tendelana uri zwi do kuvhanganya mitshelo zwa la zwi zwivhili. Fhedzi Sankambe, nga hone vhukwila hatsho, tsho la minwe ya mitshelo Mudzhou a sa zwi vhoni. Nga madekwana musi Mudzhou o edela, Sankambe tsha dzhia makero a mitshelo ye tsha la tsha a dzhenisa zwikwamani zwa Mudzhou.

Nga matsheloni musi Mudzhou na Sankambe zwi tshi vuwa zwa wana minwe ya mitshelo yo liwa. Zwa tuwa zwa ya musanda u hwelela mulandu wa u tswelwa mitshelo. Khoro ya dzula hu sa vhe na we a tenda uri ndi ene o laho mitshelo.
Sankambe tsha dzinginya uri ndi khwine tshone na Mudzhou zwi tshi fhufha uri hu vhoniwe uri ndi nnyi o laho mitshelo. Phukha dzothe dza tendelana na zwo dzinginywaho nga Sankambe.

Sankambe tsha vha tshone tsha u thoma u fhufha. Tsha fhufhela ntha ntha nahone tshi tshi khou mwemwela. A huna tsho waho zwikwamani zwa Sankambe. U bva afho ha fhufha Mudzhou. Makero a mitshelo a wa zwikwamani zwa Mudzhou. Izwo zwo mangadza na Mudzhou ene mune uri makero a bva ngafhi.

Sankambe tsha tsha amba na Thovhele wa dziphukha, Ndou, tshari: “Khakhamela, tshidadamuhali, marunga dzi nndevhelaho. Thovhele nga vha lalame. Mudzhou u tea u miliswa tshivhindi nga vhuvhava hawe!” Phukha dzothe na Thovhele Ndou zwa tendelana na Sankambe.

Mudzhou a vhulawa, a thukhukanywa. Zwipida zwa Mudzhou zwa phakhekanywa phukha uri dzi ise hayani dzi le. Sankambe tsha humbela tshizwa tsha Mudzhou. Musi tshi ndilani ya u ya hayani tsha amba tshi tshothe tsho takala tshari: “Nda vhulaisa Mudzhou ndari a vhulawe.” Phukha dzinwe dza vhudzisa: “Uri mini Sankambe.” Sankambe tsha fhindula tshari: “Ndi ri tshizwa tsha Mudzhou tshi khou nndemela.”

Vha tshi fha magulu a Mudzhou. Tsha dovha tsha amba tshari: “Nda vhulaisa Mudzhou ndari a vhulawe.” Phukha dza dovha dza vhudzisa: “Uri mini Sankambe.” Sankambe tsha fhindula tshari: “Ndi ri magulu a Mudzhou a khou nndemela.”
Sankambe tsha fhiwa tshivhindi tsha Mudzhou. Tsha dovha tsha amba tshari: “Nda vhulaisa Mudzhou ndari a vhulawe.” Phukha dza dovha dza vhudzisa: “Uri mini Sankambe.” Sankambe tsha fhindula tshari: “Ndi ri tshivhindi tsha Mudzhou tshi khou nndemela.”

Sankambe tsha fhiwa tswio dza Mudzhou. Tsha dovha tsha amba tshari: “Nda vhulaisa Mudzhou ndari a vhulawe.” Phukha dza dovha dza vhudzisa: “Uri mini Sankambe.” Sankambe tsha fhindula tshari: “Ndi ri ndo vhulaisa Mudzhou ndari a vhulawe. Ndi nne o laho mitshelo nda dzhenisa makero zwikwamani zwa Mudzhou o edela.”

Phukha dzo mbo di tshi gidimisa dzi tshi toda u tshi vhulaha. Sankambe tsha shavhela madini fhedzi Phungubwe ya kona u tshi fara nga mutshila. Ya vhidzelela dzinwe phukha uri yo fara Sankambe. Sankambe tsha fhindula tshari: “A wo ngo fara nne wo fara mudzi wa Mutulume. Phungubwe ya litsha mutshila wa
Sankambe, tsha ponyoka, tsha ya Makhokha.

Ha mbo di vha u fa ha lungano.